Mat 26 | MHL | STEP | Aria Yeesus opora nain wia maakep weesereya ona teeria wia maakek,

Matthew 26

Yeesus ifakimowa naep opora kokot anumamik

(Mak 14.1-2, Luk 22.1-2, Yon 11.45-53)

1 Aria Yeesus opora nain wia maakep weesereya ona teeria wia maakek, 2 “Ni amisareman, fofa erup ikiweya Pasowa maapora naikuan. Ne fofa neeke Mua Muuka opap nomokow moke-pa patot warikuan,” naap maek. 3 Ne aria wi pris woos mua wi owow woos mua unowiya pris woos mua Kaiafas koora-pa wiam aawep aakunemik, 4 Yeesus kamenap onap kokot opap ifakimowa nain. 5 Aakunemi maemik, “Maapora epa-pa me opikua, oko wi yakeyak maneka-ke iiwua yia purupomikuan.”

Emeria oko-ke sanda aawep Yeesus ikiwosa-pa sawikomak

(Mak 14.3-9, Yon 12.1-8)

6 Aria Yeesus Betani-pa ikok Saimon koora-pa wiar ikua. Mua nain iiriw mia gigir mane-maneka onaiya ikok sariarek. 7 Ne aria Yeesus nan ikok maa enem-ikaeya emeria oko-ke ekapok. Ekapemi sanda botol opaimika wuepap o ikiwosa-pa sawikomak. Sanda nain sesa maneka. 8 Yeesus teeria-ke naap urufap muninemi wi-wieniw aakunemik, “Sa, maa eliwa nain moram wesusak ya. 9 Nain sesekekamik-na maamuma maneka aawep wi maamuma marew ikemik nain wiekamik.” 10 Naap aakunemik nain Yeesus kema iiriw wiar amisarep wia maakek, “Ni moram emeria fain kema wiar samoriman? O sira eliw akena efa onak. 11 Ni mua maa marewa nain anane niamiya ikaiwkin eliw wia asipam-ikowen. Ne yo anane niamiya me ikainen. 12 Emeria fain sira naap efa onak nain yo efa soopowa nain mia kiikir efar saliwap-puiya. 13 Naapeya makena nia maakiyem, ikoka miiw unowa-pa yo opor eliwa nain wia maakem-miawemi o sira eliwa efa onak nain pun wia maakikuan. Ne os pun kema suuwikuan.”

Yeesus opowa nain opora kaikamik

(Mak 14.10-11, Luk 22.3-6)

14 Ne aria ona teeria mua ten kuisow erup nain, mua oko Yuudas Iskariot naimik nain-ke wi pris woos mua wiar ikiwok. 15 Ne wia nokarek, “Yo maa mauwa yiiwkin Yeesus ni wapena-pa nia wuominen?” Naap wia maakeya maamuma niiyen naemi maamuma tuunap siliwa maamuma ten arow naap iwemik. ^{▼▼26.15Maamuma nain feenap, no siiwa ikur e okaiwi-pa kuisow uuwap sesa aawin naap.} 16 Naeya Yeesus wi wapena-pa wiar wuowa nain era wia imenam-ikomak.

Yeesus ona teeria onaiya Pasowa enowa onamik

(Mak 14.12-21, Luk 22.7-14 ne 22.21-23, Yon 13.21-30)

17 Aria emer kekanowa enowa maapora kerereya Yeesus teeria-ke nokaremik, “Nee, i kaaneke ikiwep Pasowa maapora maa enowa onomiyen?” 18 Naeya wia maakek, “Ni owow maneka ekap mua oko wiar fuunep feenap maakeka, ‘I someka mua-ke maek, “Yo epa fan efar kererek, naapeya yena teeria onaiya no koora-pa feeke Pasowa enowa onu naep naimik.”’” 19 Naap wia sesekeya ikiwep ona wia maakek naap epa saliwami Pasowa enowa onamik.

20 Aria urera Yeesus ona teeria onaiya ikip fuunemik. 21 Wi pokap maa enem-ikok wia maakek, “Yo makena nia maakinen, ni mua kuisow ikoka wi iiwua wapena-pa efa wuinon.” 22 Wi naap miimap kema samorarep mua kui-kuisow o nokaremik, “Maneka, yo me efa maen-yon aa?” 23 Naeya wia maakek, “I maa enemi mua yo efamiya emer ikowa kakawa epaskun maa eka epira-pa suuwap enimimik nain, mua oko-ke naap efa oninon. 24 Ae, makena, yo Mua Muuka ikoka umowa nain opora iiriw Mua Maneka opora-pa siisimep-puamik naap akena arinon. Aa wiisak, mua eena yo wi iiwua wapena-pa efa wuiya nain samor aawinon. Onak me muukarekak-na eliw-yon.” Naap maek. 25 Yuudas mua eena o iiwua wapena-pa wiar wuowa nain-ke iikirap maek, “Maneka, yo efa maen-yon aa?” Naeya Yeesus-ke maakek, “Ae, pepek maen.”

Yeesus komunio wuak

(Mak 14.22-26, Luk 22.15-20, 1 Korin 11.23-25)

26 Aria wi maa enem-ikok Yeesus-ke emer ikowa opap Mua Maneka sira eliwa naakep-puap wu-wuepap wienakemi maek, “Aawep enimeka. Fain yena mia-ke.” 27 Ne wain urupa opap Mua Maneka sira eliwa naakep-puap wiemi wia maakek, “Ni unowiya enimeka. 28 Eka fain yena aka-ke. Opor enuma eena Mua Maneka ni niamiya kaikiya nain yena aka fainiw koonowinon. Aka efar oromi miiw unowa emeria mua pina wiar iirarinon. 29 Yo nia maakiyem, yo wain eka aakisa enimiyem fain kiiriw nainiw me eniminen, weetak. Naap ikok yena Auwa pika kemena-pa ikok wain eka enuma oko niamiya eniminen,” naap maek. 30 Aria wi someka awep-puap oromi ikiwep Oliw ema urupemik.

Yeesus Pita maakek, “No ikoka efa sailinan”

(Mak 14.27-31, Luk 22.31-34, Yon 13.36-38)

31 Wi ikiwem-ikok Yeesus-ke ona teeria wia maakek, “Ikok uura yo efa samoriwkin ni unowa fain baurarowen. Moram Mua Maneka opora iiriw siisimep-puamik nain maek,

‘Ikoka sipsip nepiow mua waremkun sipsip wiar baurarep pukikuan.’
(Sekaraiya 13.7)

32 Nain yo ikoka umep ikok iikirap Galili ikiwep neeke nia arep ikainen.” 33 Naap wia maakeya Pita-ke maakek, “Wi unowa fain ikoka baurarikuan-na yo wia, me nefa piipuinen.” 34 Naeya maakek, “Yo maken akena nefa maakiyem, ikok uura aara me farowa ikaeya no sailemi maem-ikainan, mua fain yo me amisarem. Naap sailowa arow arinan.” 35 Ne Pita-ke kekanemi maakek, “Weetak, yo naap me mainen. I eliw ikos yia ifakimuk, nain yo me sailinen.” Naap maeya Yeesus teeria unowiya Pita maek naapiw maemik.

Yeesus Getsemani epa-pa Mua Maneka farek

(Mak 14.32-42, Luk 22.39-46)

36 Aria nan ikok Yeesus ona teeria unow onaiya epa Getsemani naimik nain ikiwemik. Ikip fuunep wia maakek, “Ni feeke pokap ikaiwkin yo feek ekap Mua Maneka farinen.” 37 Ne ekami Pita ne Sebedi muuka erup, Yon Yems ikos naap wia maakeya ookap ekamik. Kema samor-ko peelalemi kema pinarep 38 wia maakek, “Yo kema manek akena samorariyem, yo fan umiyem. Ni me ineka, feeke pokap ikeka.” 39 Ne lawisik ekap keema wueskap iima ifemakep Mua Maneka faremi maek, “Oo Auwa, no era oko-ko ikainok-na no nena suusa yiep-puan nain perekome! ^{▼▼26.39Yeesus opora maek nain wi Iibru opora ookami maek, “Urupa yien nain iirarome.” Opora nain kemena feenap, “Umowa efa suuwan nain iirarome.” Oko ni kemena me aawowen nain Mauwake opora maemi kemena epaskun nain wuamik, “Suusa yiep-puan nain perekome.”} Nain yo oram maiyem, nena kookalowa muutiw ooke.” 40 Mua Maneka naap farep-puap kirep epami wiam arow nain wia urufak-na wi inep ikemik. Ne Pita ifimami maakek, “Niam arow, ni lawisiw muuta pokap ikowa nain ni ewur ineman. 41 Ni me ineka. Mua Maneka farem-ikeka. Naap onowen-na akimowa-pa me oro-boonowen. Niena kema-ke yo yookowa kookaliman, nain mia-ke palanow marew.” 42 Naap wia maakep-puap kiiriw ekap Mua Maneka faremi maek, “Oo Auwa, nena suusa yiep-puan nain me perekowa pun eliw. Yo nena kookalowa nefar ookap uminen.” 43 Naap maep kiiriw epak-na wi mokoka samor akena pinarep iiriw inep puemik. 44 Naap mokok kokot wia urufap-puami nainiw ekap Mua Maneka farek, opora iiriw maek nain kiiriw maek. 45 Naap iki-ikok nainiw epami wia maakek, “See, ni naap inep ikowen-i? Ni iikirap urufeka, yo Mua Muuka efa opap wi mua samora wapena-pa wiar wuowa nain mamaiya arek. 46 Arika, iikiriwkin ikiwikua. Urufeka, mua yo iiwua wapena-pa efa wuowa nain nan ekapiya.”

47 Aria naap wia maakem-ikaeya Yuudas ekapep fuunek, eena ona teeria mua nain. Ne mua teeria maneka o wameiya ekapemik nain wi pris woos mua ne wi owow woos mua-ke wia sesekiwkin kuuma fura naap aawep ekapemik. 48 Yuudas-ke amisa iiriw wiep-puak, “Yo ekami mua nain opap wuakemkun-na maeka, mua makena naneka. Naeya ekap opaka.”

49 Ne aria o Yeesus wiar ekami maek, “Oo, somek mua,” naap maemi opap wuakek. 50 Naap oneya Yeesus-ke maakek, “Emar, no kamenap onekam naep-na onap-pue,” naap maek. Ne wi teeria maneka nain ekami opamik. 51 Ne aria wiam arow wameiya ikemik nain mua oko-ke iikirap fura maala aawep pris woos mua uuwow mua ifana wiar puukeya orok. 52 Ne Yeesus-ke maakek, “No fura nain neek wue. Mua fura opimik nain wiena kiripowa fura-pa umikuan. 53 Yo yena Auwa maakinen-na wi ensel teeria maneka ten kuisow erup wia sesekeya ewur akena ekapemi efa asipikuan. Yo naap onowa me pepek-i? 54 Auwa eliw naap oninon, nain yo sirirowa aawiyem nain Mua Maneka ona opora yo efa maek nain, kamenap naep makena arinon?” 55 Naap wia maakep-puap kiremi iiwua teeria maneka nain wia maakek, “Ni yo mua samora-ke efa naiman-i? Naeya fura kuuma onaiya efa opowa ekapeman. Yo anane tempel koora-pa pokap ikok suule wia onam-ikem, nain yo me efa opaman. 56 Aa-na eliw, maa unowa aakisa efa oniman fain iiriw wi profet efa maemik nain makena arowaman,” naap wia maakek. Ne aria ona teeria-na o piipuap bauraremik.

Wi owow woos mua-ke Yeesus opora-pa wuamik

(Mak 14.53-65, Luk 22.54-55 ne 22.63-71, Yon 18.13-14 ne 18.19-24)

57 Aria wi teeria Yeesus opap aawep pris woos mua unuma Kaiafas naimik nain koora wiar pikiwemik. Wi sira amis mua ne wi owow woos mua iiriw wiam aawep nan ikemik. 58 Ne aria Pita pun Yeesus ememin ookami ikiwep koora nain pika nain kererek. Kererep sisin pika kemena ikiwep wi ami mua wiamiya pokap ikua, sira kamenap-ko imenariya nain amisarekam naep. 59 Aria wi pris woos mua ne wi Kaunsel Maneka unowiya Yeesus ifakimowa nain wadol opora papako imenap neeke ifakimiyen naemik. 60 Naap onamik-na pina-ko me wiar imenamik. Teeria maneka ekapemi wadol opora mikamik pun naap, pina-ko me wiar imenamik. Naap ikok mua erup iikirami maemik, 61 “Mua fain naap maek, ‘Yo eliw Mua Maneka tempel koora wiar te-teekap fofa arow muuta kiiriw enuma kuainen,’ naap maek.” 62 Ne aria pris woos mua-ke iikirami o maakek, “Wi fain opora unowa nefa mikimik nain no opora-ko me wia kiripominan-i?” 63 Naap nokarek-na opora-ko me kiripomak. Ne pris woos mua-ke kiiriw maakek, “Mua Maneka anane ikaiya nain nefa miimam-ikaeya no opora makena mae, aria no Krais-ki? No Mua Maneka Muuka-i?” 64 Naeya maakek, “Ae, no pepek efa maen. Nain yo feenap nefa maakiyem, ikoka Mua Muuka Mua Maneka Kekanowa Akena nain aken ekeria-pa wiar pokap ikok maa ipisia onaiya iinan-pa orom-ikaeya urufowen!” Naap maek. 65 Opora muut nain pris woos mua-ke kema bagiwirap ona mia suuwowa pere-perekami maek, “Opor papako o maemik nain me wiar kema suuwiyen. Ona opora aakisa maek nain wiar miimaman-i? Mua Maneka firekiya ya. 66 Aria ni kema kamenap maiman?” Ne wis-ke iikirami maemik, “Mua Maneka firekiya, naapeya uminok akena.” 67 Naap maemi opeka waremi arufamik. Ne wi papako-ke kumunkura-pa arufami maakemik, “No Krais-ki? 68 Naapeya-na nena mokoka-pa yia urufowa saarik kakeniw yia mae, nos-ke efa arufan, naap mae.”

Pita-ke Yeesus me amisarem naek

(Mak 14.66-72, Luk 22.56-62, Yon 18.15-18 ne 18.25-27)

69 Aria Pita pika kemena-pa wi wionarep pokap ikaeya uuwow emeria oko-ke ekap maakek, “Nos pun Galili mua Yeesus nain wameiya ikon.” 70 Naap maeya wi mua unowa mokok epa-pa wadolalemi maek, “No maa mauwa maen? Yo me amisarem.” 71 Naap maep-puap oromi omopora maneka-pa iimarep ikaeya emeria oko-ke urufap wi mua nan ikemik nain wia maakek, “Mua fain-na Nasaret mua Yeesus teeria nain-ke.” 72 Ne kiiriw nainiw wadolalemi maek, “Mua iinan, maken akena maiyem, yo mua nain me amisarem!” 73 Naap iki-ikok wi mua nan iimarep ikemik nain-ke ekap maakemik, “Makena, nos pun wi teeria-ke. I nena aakunowa iwakara-pa nefa amisaremik, no me sailinan!” 74 Naap maiwkin sailemi maek, “Maken akena, yo mua nain-ko me amisarem. Yo opora fain wadolalinen-na samor aawinen.” Naap maeya aara farek. 75 Aara fareya Yeesus iiriw Pita maakek nain kema wiar epak, “No ikoka aara me farowa ikaeya me efa amisarem naep sailowa arow arinan.” Opora nain kema suuwap pika kemena-pa orop kema samorarep kerew omok.